Cerdd Iaith: Dod â dysgu ieithoedd yn fyw
Mae Cerdd Iaith yn adnodd creadigol ar gyfer dysgu ieithoedd mewn ysgolion cynradd yng Nghymru, gan ddefnyddio cerddoriaeth, drama, odl, rhythm ac ailadrodd i wneud dysgu ieithoedd yn ddifyr, yn hygyrch ac yn hwyl. Mae hefyd yn ffordd wych o gyflwyno’r Gymraeg i ddysgwyr sydd newydd ddechrau dysgu neu ddefnyddio’r iaith.
Wedi’i gynllunio ar gyfer disgyblion 7–11 oed, mae Cerdd Iaith yn cefnogi dysgwyr ar wahanol gamau o’u taith ieithyddol – o’r rhai sy’n cymryd eu camau cyntaf yn y Gymraeg i’r rhai sy’n dechrau archwilio Sbaeneg, Almaeneg a Ffrangeg. Mae ei ddull creadigol ac amlieithog yn helpu plant i greu cysylltiadau rhwng ieithoedd ac i ddatblygu eu hyder, eu chwilfrydedd a’u sgiliau cyfathrebu.
Mae Cerdd Iaith yn cefnogi Maes Dysgu a Phrofiad Ieithoedd, Llythrennedd a Chyfathrebu Cwricwlwm i Gymru, gan roi ffordd ymarferol a hwyliog i athrawon gyflwyno dysgu amlieithog yn yr ystafell ddosbarth.
Datblygwyd Cerdd Iaith gan British Council Cymru, gan weithio’n agos gydag athrawon ysgolion cynradd ac ieithyddion, cerddorion ac ymarferwyr creadigol blaenllaw. Mae’n cynnwys caneuon gwreiddiol a grëwyd yn arbennig ar gyfer y rhaglen gan yr Athro Mererid Hopwood, un o lenorion a beirdd mwyaf adnabyddus Cymru, a’r cyfansoddwyr Gareth Glyn a Tim Riley.
Hawdd i’w ddefnyddio yn eich ystafell ddosbarth
Nid oes angen unrhyw hyfforddiant blaenorol mewn ieithoedd na cherddoriaeth i ddechrau arni. Mae Cerdd Iaith yn darparu popeth sydd ei angen arnoch, gan gynnwys gweithgareddau cam wrth gam, fideos, caneuon gwreiddiol, geiriau, cerddoriaeth ddalen a syniadau ar gyfer ymestyn y dysgu.
Dewiswch o blith gweithgareddau Dechreuwyr ac Adeiladu Hyder a’u defnyddio’n unigol, eu cyfuno i greu gwers, neu archwilio’r adnoddau drwy bum thema: Patagonia, Fi, Y Traeth, Natur, ac Amser a Lle.
Mae ysgolion ledled Cymru wedi defnyddio Cerdd Iaith yn llwyddiannus i gyflwyno’r Gymraeg ac ieithoedd rhyngwladol yn yr ystafell ddosbarth, gan helpu plant i ddarganfod y pleser o gyfathrebu, creu a dysgu gyda’i gilydd mewn gwahanol ieithoedd.
Llun: Patric Olner.